Martröð í Hafnarfirði

Jón Pétur, sem er að byrja í sjöunda bekk, hlakkar síður en svo til þess að hefja nýtt skólaár. Hann hefur alla tíð verið vinafár og fótboltastrákarnir áreita hann nánast daglega. Ekki skánar ástandið þegar bekkurinn fær nýjan kennara sem kemur krökkunum afar undarlega fyrir sjónir. Stuttu seinna fara skrítnir hlutir að gerast í Hafnarfirði þegar einn fótboltastrákanna hverfur sporlaust. Í kjölfarið hefst óútreiknanleg atburðarrás sem aðeins Jón Pétur og nýju vinir hans virðast geta stöðvað. Hvar er Alexander? Hvað er að gerast í hrauninu í Hafnarfirði? Tengist Magga kennari þessu öllu saman?